خطرت على بالى كده إمبارح لما أتجوز هتجوز مين ؟؟
واحد زمالكاوي متعصب
ولا واحد أهلاوي
ولا واحد إسمعلاوى
مفتكرش انى ممكن افكر انى ارتبط بواحد اهلاوى طب ازاى يعنى
مقدرش اتخيل نفسى حرم بنى ادم اهلاوى
بالنسبه للزملكاويه ( الشباب )
تتجوز بنوته زملكاويه
ولا اهلاويه متعصبه
ولا اسمعلاويه
حتقولى بت يا ديرو سبيها على الله ومتوجعليش دماغى لحدفك باللى قدامى
ارد عليك انا هنا واقولك بطل قله زوق وجاوب على اد السؤال
تعمل إيه لو إتجوزت واحدة أهلاوية وكمان متعصبة ؟؟
تفتكر فى ماتش الزمالك والاهلى حتعمل فيها ايه .
حترد انت عليه وتقولى ملكيش دعوه انتى حبقا اخليها تتفرج جوه لوحدها وانا حتفرج بره لوحدى
ارد عليك واقولك يبقا انت متعرفش الاهلاويه يابابا يموتوا يغيظوا خلق الله يعنى تفتكر ان لو سابق سنه وزمانه عماد بك متعب جاب جون هى حتعد ساكته دى حتشردك فى العماره
حتقولى انت هنا اتكبسى يا اختى حنجيب حكام من بره مصر من بوركينافاسو مثلا لضمان الحياديه
هنا اقولك مدام فيها حكام يبقا مبروك عليك الخساره واستعد للعلقه من مراتك ... يا حسره على الزملكاويه الرجاله
وكمان حتلقيها اعده كده ويجلى برنامج لوائل جمعه مثلا حتفضل تغازل فيه قدامك وتقولك شايف شعره ناعم وطويل ازاى وطبعا لو اتكلمت وفتحت بؤك حتقولك روح شوف قرعه علاء عبد الغنى الاول
دا غير التريقه والاستظراف منها بعد كل هزيمه للزمالك _ متعوده دايما _ يعنى مش حتسلم من لسانها الاحمر ومش حيبقا قدامك طريقه غير انك تحدفها من البلكونه عشان تستريح
وهنا غير انك يعينى يا ضنايه حتكون متجوز اهلاويه لا كمان حتكون قاتل ومحكوم عليك بالاعدام
ياترى لسه عايز تتعدم قصدى تتجوز اهلاويه ؟
اما بقا لو اتجوزت بنوته زملكاويه شوف النعيم اللى حتبقا فيه ؟
حتتجوز واحده عايشه معاناتك و حاسه بيك
ناسى ان فيه ماتش للزمالك النهارده حتفكرك اتاكد ابداا انك مش حيفوتك اى ماتش غير لو عند ظروف
ولو عندك ظرف ومتفرجتش على الماتش لما ترجع البيت حتعد كده انت زى الباشا وهى حتحكيلك اللى حصل فى الماتش من طقطق لسلامو عليكم
لو خسر الزمالك لا قدر الله حتلاقيها اول واحده تطبط عليك وتقولك حنعوضها الماتش الجاى والدورى لسه فى الملعب وحتنسيك وتحاول هى معاك تنسى الخساره ... عكس الاهلاويه اللى حتكرهك فى نفسك وفى الحياه من كتر الشماته ... ياساتر عليهم ناس
دا غير لما الزمالك يكسب بطوله ان شاء الله حتلاقيها اعده تهيص معاك وفرحانه و ممكن تروح معاك الاستاد او ممكن تنزل معاك فى العربيه وتهيص زيك حتحسسك بمعنى الفرحه وحتحس ان الزمالك اخد بطوله بجد ... عكس الاهلاويه اللى لو الزمالك اخد بطوله حتقلبلك البيت نكد وغم وحتتحول فاجاه لامينه رزق
صدقنى لو اتجوزت زملكاويه حتحس انك عايش فى الجنه
ياترى عايز تعيش فى الجنه قصدى تتجوز زملكاويه ؟
. . . .
بالنسبه للزملكاويه ( البناويت )
من اولها كده عشان منزعلش من بعض محدش يقولى منكم انها لو ارتبطت باهلاوى ممكن تتنازل عن زملكاويتها .... خليكم حلوين عشان مقلبش عليكم
تعملى إيه لو إتجوزتى واحد أهلاوي وكمان متعصب ؟؟
طبعا بما انك انتى البنوته وهو الراجل فكلمته هى اللى حتمشى يعنى يقول الكلمه لازم تتنفذ
فاول كلمه حيقولهالك وحياتك قبل بحبك حيقولك انسى الزمالك انتى من هنا ورايح اهلاويه غصب عنك ... فى بنات جدعه حتتمسك بزملكاويتها ومش حترضى وسعتها حتبقا حياتها كلها نكد فى نكد وهو مش حيسكتلها ... وفى بنات جبانه حتتنازل عن زملكاويتها مع اول شخطه ودول بقا انا اللى مش حسكتلهم
البنات اللى حتتنازل دول ملناش دعوه بيهم هما اختاروا طريق التهلكه
نجى للبنات المحترمه اللى رفضت تتنازل عن زملكاويتها :
لو فى ماتش للزمالك وفى نفس الوقت فى ماتش تانى للاهلى شغال ... انسى انك تتفرجى على ماتش الزمالك
حتقوليلى هنا متدخليش فى اللى ملكيش فيه حبقا اتفرج على الماتش فى التلفزيون التانى
اقولك اناهنا انتوا اخركم تلفزيون واحد بس و 4 بوصه كمان يعنى تتفرجوا على شراب اللعيبه مباشر وبقيه الجثه فى الاعاده
لو فى ماتش للزمالك والاهلى وهو قالك تعالى معايا الاستاد حيصمم انه يعد فى مدرجات الدرجه التالته لجماهير الاهلى ولو الاهلى خسر طبعا حيكون مش طايق اى حاجه من ريحه الزمالك يادوبك هى جمله واحده حيقولها " يا جماعه الوليه دى زملكاويه " وطبعا هو اول واحد حيجرى عشان يحجزلك فى القصر العينى .
لو قولتى مره كده ان جمال حمزة ولا شيكابالا احرف من ابو تريكه يبقا ليلتك فسفورى وممكن تطلقى ودا الاكيد اللى حيحصل
يا ترى عايزه تتكسحى وتطلقى قصدى تتجوزى اهلاوى ؟
تعملى إيه لو إتجوزتى واحد اسمعلاوى وكمان متعصب ؟؟
طبعا حتقوليلى هنا ان الاسمعلاويه غلابه وبيكرهو الاهلى زينا
اقولك انا هنا دى مش حنختلف فيها بس التقيل جى وراه :
طبعا كل يوم حيجيلك مش طايق نفسه واعد يفكر ياترى الاسماعيلى حيجيب موارد منين ؟ وحيفضل يحوش مرتبه على امل انه يقدر يساعد الاسماعيلى فى حاجه ؟ ولا حياكلك ولا حيشربك ولا حيفسحك وكل دا عشان يقدر يساعد الاسماعيلى .
حتلقيه مش طايق نفسه ولا طايقك وكل شويه متنرفز من الاهلى ويشتم ويدعى عليه .
كل دا مش مهم المشكله هنا بقا :
وانتوا نايمين فى امان الله حتلقيه فاجاه يقوم ويقول حسنى لااااااااااااا الاهلى لااااااااااااا ... حسنى ااااااه الاسماعيلى ااااااه
دا غير انه كل شويه حيمسك شعرك وشعرايه شعرايه " حسنى فى الاسماعيلى ، حسنى فى الاهلى وهكذا " لحد ما حتبقى قرعه رسمى
ياترى عايزه تبقى قرعه قصدى تتجوزى اسمعلاوى ؟
اما بقا لو ربنا كرمك بواحد زملكاوى فتاكدى ان ربنا بيحبك ؟
لو الزمالك كسب اى حاجه نفسك فيها حتبقا عندك فى لحظه
حيوديكى معاه الاستاد وحتعيشى جو الفرح والحزن .. التوتر والاطمئنان
ودا غير انه حيحترمك ومش حيقدر يتريق عليكى
لو بتحبى لاعب فى الزمالك " طبعا حيكون جمال حمزة " حتبقى مش محتاجه تخبى عليه لانه حيكون بيحبه اكتر منك اصلا
حتحسى انك عايشه ملكه وهو ملك فى امبراطوريه عشق الزمالك
ياترى عايزه تعيشى ملكه قصدى تتجوزى زملكاوى ؟
عايزه اعرف ايه رئيكم ؟
وهل الموضوع ده مش فارق معاك كتير ولا يفرق ؟
قلنا نبقى زملكاوية م الاول مش عاجبك اشرب بقى 
